ប្រទេសចិន នឹងធ្វើជាម្ចាស់ផ្ទះកីឡាអាស៊ីឆ្នាំ២០២៣ បន្ទាប់ពីការពន្យារពេលដោយជំងឺកូវីដ-១៩

សេចក្ដីលម្អិត

ជំពូក៖ ព័ត៌មានអន្តរជាតិ

 អ្នករៀបចំពិធី បាននិយាយកាលពីថ្ងៃអង្គារថា ប្រទេសចិន នឹងធ្វើជាម្ចាស់ផ្ទះព្រឹត្តិការណ៍ Asian Games ឆ្នាំ 2022 នៅឆ្នាំ 2023 ខាងមុខនេះ បន្ទាប់ពីបានពន្យារពេលព្រឹត្តិការណ៍នៅទីក្រុង Hangzhou ដោយសារតែជំងឺ COVID-19។

ក្រុមប្រឹក្សាអូឡាំពិកអាស៊ី (OCA) បាននិយាយថា ឥឡូវនេះហ្គេម នឹងប្រព្រឹត្តទៅនៅទីក្រុង Hangzhou ចាប់ពីថ្ងៃទី 23 ខែកញ្ញា ដល់ថ្ងៃទី 8 ខែតុលា ឆ្នាំ 2023។ ព្រឹត្តិការណ៍នេះ ដើមឡើយគ្រោងនឹងប្រារព្ធឡើងនៅខែកញ្ញាឆ្នាំនេះ ប៉ុន្តែអ្នករៀបចំពិធី នៅក្នុងខែឧសភា បានពន្យារពេលវា ខណៈដែលប្រទេសចិន បានព្យាយាមលុបបំបាត់ការកើតឡើងវិញនៃ COVID-19 ដ៏ធំនៅក្នុងតំបន់មួយចំនួននៃប្រទេស។

កាលបរិច្ឆេទថ្មីនេះ ត្រូវបានជ្រើសរើសដើម្បីជៀសវាង "ប៉ះពាល់ជាមួយព្រឹត្តិការណ៍កីឡាអន្តរជាតិសំខាន់ៗផ្សេងទៀត" ។ Asian Games ជាធម្មតាទាក់ទាញអត្តពលិកជាង 10,000 នាក់ មកពីទូទាំងតំបន់។

សូមបញ្ជាក់ថា ប្រទេសចិន គឺជាប្រទេសសេដ្ឋកិច្ចដ៏សំខាន់ចុងក្រោយ ដែលបានប្តេជ្ញាចិត្តក្នុងការលុបបំបាត់ការរីករាលដាលនៃមេរោគក្នុងស្រុក តាមរយៈការបិទខ្ទប់ប្រទេសដ៏តឹងរ៉ឹង ការធ្វើតេស្តទ្រង់ទ្រាយធំ និងការត្រួតពិនិត្យយ៉ាងតឹងរ៉ឹងលើការធ្វើដំណើរអន្តរជាតិ នេះបើតាមការផ្សាយរបស់ AFP កាលពីយប់ថ្ងៃអង្គារ។