ចិន ដាក់ពាក្យបណ្តឹង បន្ទាប់ពីលោក Biden និយាយថា សហរដ្ឋអាមេរិក នឹងការពារកោះតៃវ៉ាន់ក្នុងការឈ្លានពានរបស់ចិន

សេចក្ដីលម្អិត

ជំពូក៖ ព័ត៌មានអន្តរជាតិ

ក្រសួងការបរទេសចិន បាននិយាយកាលពីថ្ងៃចន្ទថា ប្រទេសចិន បានដាក់ "សេចក្តីបន្ទោសយ៉ាងតឹងរ៉ឹង" ជាមួយសហរដ្ឋអាមេរិក បន្ទាប់ពីប្រធានាធិបតីសហរដ្ឋអាមេរិកលោក Joe Biden បាននិយាយថា កងកម្លាំង អាមេរិក នឹងការពារកោះតៃវ៉ាន់ ក្នុងករណីមានការឈ្លានពានរបស់ចិន។

ស្រ្តីអ្នកនាំពាក្យក្រសួងការបរទេសចិន បាននិយាយនៅក្នុងសន្និសីទសារព័ត៌មានជាទៀងទាត់ថា ប្រទេសចិន រក្សាសិទ្ធិក្នុងការចាត់វិធានការចាំបាច់ទាំងអស់ ដើម្បីឆ្លើយតបទៅនឹងសកម្មភាពដែលបំបែកប្រទេសជាតិ។

លោកស្រី ក៏បានជំរុញឱ្យសហរដ្ឋអាមេរិកដោះស្រាយបញ្ហាពាក់ព័ន្ធនឹងតៃវ៉ាន់ "ដោយប្រុងប្រយ័ត្ន និងត្រឹមត្រូវ" និងមិនបញ្ជូន "សញ្ញាខុស" ដល់កងកម្លាំងបំបែកខ្លួនឯករាជ្យតៃវ៉ាន់ ដោយព្រមានសហរដ្ឋអាមេរិក កុំឱ្យធ្វើឱ្យខូចទំនាក់ទំនងចិន-អាមេរិក និងសន្តិភាពនៅច្រកសមុទ្រតៃវ៉ាន់។

សូមបញ្ជាក់ថា ក្នុងបទសម្ភាសន៍ជាមួយទូរទស្សន៍អាមេរិក CBS រយៈពេល ៦០នាទី ដែលត្រូវបានចាក់ផ្សាយកាលពីថ្ងៃអាទិត្យចុងសប្តាហ៍កន្លងទៅនេះ ប្រធានាធិបតីអាមេរិក លោក Joe Biden បាននិយាយជាថ្មីថា កងទ័ពអាមេរិក នឹងការពារកោះតៃវ៉ាន់ ក្នុងករណីដែលចិនប្រើកម្លាំងយោធា ហើយនេះជាការធ្វើអត្ថាធិប្បាយដ៏ច្បាស់លាស់បំផុតរបស់លោក ជុំវិញបញ្ហាដ៏រសើបនេះមកទល់បច្ចុប្បន្ន ដែលជារឿយៗតែងតែបង្កឱ្យចិនផ្ទុះកំហឹង នេះបើតាមការផ្សាយរបស់ Reuters កាលពីថ្ងៃចន្ទ។