ក្រុមអ្នកតវ៉ាអ៊ីរ៉ង់ បានប្រមូលផ្តុំគ្នានៅទូទាំងប្រទេសក្នុងសប្តាហ៍ទីបី

សេចក្ដីលម្អិត

ជំពូក៖ ព័ត៌មានអន្តរជាតិ

ក្រុមបាតុករ បានប្រមូលផ្តុំគ្នានៅទូទាំងប្រទេសអ៊ីរ៉ង់ ហើយការតវ៉ា ត្រូវបានគេរាយការណ៍នៅទូទាំងតំបន់ឃឺដ របស់ប្រទេសនេះកាលពីថ្ងៃសៅរ៍ ចុងសប្តាហ៏ ខណៈដែលបាតុកម្ម ត្រូវបានបញ្ឆេះដោយការស្លាប់របស់ស្ត្រីម្នាក់នៅក្នុងមន្ទីរឃុំឃាំងរបស់ប៉ូលីស គឺបានឈានចូលដល់សប្តាហ៍ទីបីហើយ។

ការតវ៉ា ដែលបង្កឡើងដោយការស្លាប់របស់នាង Mahsa Amini អាយុ 22 ឆ្នាំ មកពីតំបន់ឃឺដអ៊ីរ៉ង់ បានឈានដល់ការបង្ហាញការប្រឆាំងដ៏ធំបំផុត ទៅនឹងអាជ្ញាធរគ្រប់គ្រងរបស់អ៊ីរ៉ង់ ចាប់តាំងពីឆ្នាំ 2019 ជាមួយនឹងការស្លាប់មនុស្សរាប់សិបនាក់ នៅក្នុងភាពចលាចលនៅទូទាំងប្រទេស។

មនុស្សម្នា ក៏បានចូលរួមធ្វើបាតុកម្មនៅទីក្រុងឡុងដ៍ រ៉ូម ម៉ាឌ្រីដ និងទីក្រុងលោកខាងលិចផ្សេងទៀត ក្នុងសាមគ្គីភាពជាមួយបាតុករអ៊ីរ៉ង់ ដោយកាន់រូបថតរបស់នាង Amini ដែលបានស្លាប់បីថ្ងៃក្រោយ បន្ទាប់ពីការចាប់ខ្លួនដោយប៉ូលីសសីលធម៌របស់សាធារណរដ្ឋអ៊ីស្លាម ពីបទ "ស្លៀកពាក់មិនសមរម្យ"។ និស្សិត ក៏បានធ្វើបាតុកម្មនៅសាកលវិទ្យាល័យជាច្រើនផងដែរ។

នៅសាកលវិទ្យាល័យ Tehran មនុស្សរាប់សិប នាក់ត្រូវបានឃុំខ្លួន ដោយអ្នកតវ៉ាមួយចំនួន ត្រូវបានចាប់ខ្លួននៅទីលានក្បែរសាកលវិទ្យាល័យ។ ការតវ៉ានេះ បានចាប់ផ្តើមនៅក្នុងពិធីបុណ្យសពរបស់នាង Amini កាលពីថ្ងៃទី 17 ខែកញ្ញា ហើយបានរីករាលដាលដល់ខេត្តចំនួន 31 របស់ប្រទេសអ៊ីរ៉ង់ ជាមួយនឹងគ្រប់ស្រទាប់នៃសង្គម រួមទាំងជនជាតិភាគតិច និងសាសនាបានចូលរួម និងជាច្រើនទាមទារឱ្យមេដឹកនាំកំពូល Ayatollah Ali Khamenei ធ្លាក់ចុះ នេះបើតាមការផ្សាយរបស់ Reuters កាលពីថ្ងៃចុងសប្តាហ៏។