រដ្ឋមន្រ្តីការពារជាតិចិន នឹងបំពេញទស្សនកិច្ចទៅកាន់ប្រទេសរុស្ស៉ីនិងបេឡារុស

សេចក្ដីលម្អិត

ជំពូក៖ ព័ត៌មានអន្តរជាតិ

 ក្នុងសប្តាហ៍នេះ ក្រសួងការពារជាតិចិន បានប្រកាសកាលពីថ្ងៃចន្ទថា រដ្ឋមន្រ្តីការពារជាតិចិន លោក លី សាងហ្វូ នឹងបំពេញទស្សនកិច្ចទៅកាន់ប្រទេសរុស្ស៉ី និងបេឡារុស នាសប្តាហ៍នេះ។

តបតាមការអញ្ជើញរបស់រដ្ឋមន្រ្តីការពារជាតិរុស្ស៉ី និងរដ្ឋមន្រ្តីការពារជាតិបេឡារុស លោក លី នឹងធ្វើដំណើរទៅកាន់ប្រទេសរុស្ស៉ី ដើម្បីចូលរួមសន្និសីទទីក្រុងមូស្គូស្តីពីសន្តិសុខអន្តរជាតិលើកទី១១ ហើយបំពេញទស្សនកិច្ចនៅប្រទេសបេឡារុស ចាប់ពីថ្ងៃទី១៤ ដល់ទី១៩ ខែសីហា។

កាលពីខែមេសា ឆ្នាំនេះ លោក លី ក៏បានបំពេញទស្សនកិច្ចទៅកាន់រុស្ស៉ី ម្តងរួចមកហើយផងដែរ។ ចំណែកកាលពីខែមុន ជំនួយការម្នាក់របស់លោក វ៉្លាឌីមៀ ពូទីន បានបង្ហើបឱ្យដឹងថា លោកប្រធានាធិបតីរុស្ស៉ី មានផែនការបំពេញទស្សនកិច្ចមកកាន់ប្រទេសចិន នាខែតុលាខាងមុខ បន្ទាប់ពីប្រធានាធិបតីចិន លោក ស៉ី ជិនពីង បានទៅបំពេញទស្សនកិច្ចផ្លូវរដ្ឋនៅទីក្រុងមូស្គូ ហើយប្រកាសថា ទំនាក់ទំនងរវាងប្រទេសទាំងពីរ បានឈានដល់សករាជថ្មីមួយ។

សូមបញ្ជាក់ថា ចំណងទាក់ទងរវាងចិន និងរុស្ស៉ី កាន់តែមានភាពជិតស្និទ្ធខ្លាំងឡើង បន្ទាប់ពីទីក្រុងមូស្គូ បានចាប់ផ្តើមធ្វើសង្រ្គាមឈ្លានពានលើអ៊ុយក្រែន កាលពីខែកុម្ភៈ ឆ្នាំ២០២២ ហើយក្រុមប្រទេសលោកខាងលិច បានព្រួតគ្នាដាក់ទណ្ឌកម្មយ៉ាងចាស់ដៃទៅលើរុស្ស៉ី។

រីឯទីក្រុងប៉េកាំង គឺមិនបានចូលរួមដាក់ទណ្ឌកម្ម ឬក៏ថ្កោលទោសសកម្មភាពរបស់រុស្ស៉ីឡើយ នេះបើតាមការផ្សាយរបស់ AFP ។