ប្រធានាធិបតីវៀតណាម លោក Vo Van Thuong លាលែងពីតំណែង ក្រោយកាន់តួនាទីបានត្រឹម១ឆ្នាំ

សេចក្ដីលម្អិត

ជំពូក៖ ព័ត៌មានអន្តរជាតិ

 រដ្ឋាភិបាលវៀតណាម បានប្រកាសឱ្យដឹងកាលពីថ្ងៃពុធថា គណបក្សកុម្មុយនិស្តនៃប្រទេសវៀតណាម បានសម្រេចទទួលយកការលាលែងពីតំណែងរបស់ប្រធានាធិបតីលោក Vo Van Thuong បន្ទាប់ពីរូបលោកទើបតែឡើងកាន់តួនាទីនេះ បានត្រឹម១ឆ្នាំប៉ុណ្ណោះ។

នៅក្នុងសេចក្ដីថ្លែងការណ៍មួយ រដ្ឋាភិបាលវៀតណាម មិនបានបញ្ជាក់លម្អិតពីហេតុផលនៃការលាលែងរបស់លោក Vo Van Thuong នោះទេ ដោយគ្រាន់តែនិយាយថា លោកបានបំពានលើបទបញ្ញត្តិរបស់គណបក្ស និងការប្រព្រឹត្តកំហុសឆ្គង ដែលបានជះផលអវិជ្ជមានដល់សាធារណៈមតិ កិត្តិយសរបស់គណបក្ស រដ្ឋ និងខ្លួនលោកផ្ទាល់។

គណៈកម្មាធិការមជ្ឈិម ដែលជាស្ថាប័នសម្រេចចិត្តកំពូលនៃគណបក្សកុម្មុយនិស្ដវៀតណាម បានទទួលយកការលាលែងពីតំណែងរបស់លោក Vo Van Thuong តែជាងមួយឆ្នាំប៉ុណ្ណោះ បន្ទាប់ពីលោកត្រូវបានបោះឆ្នោតជ្រើសតាំងជាប្រធានាធិបតី។

ចំណែកកិច្ចប្រជុំពិសេសមួយរបស់សភាវៀតណាម នឹងត្រូវធ្វើឡើងថ្ងៃព្រហស្បតិ៍នេះ ជាពេលដែលអ្នកតំណាងរាស្ត្រ ត្រូវបានរំពឹងថា នឹងទទួលស្គាល់ការសម្រេចចិត្តរបស់គណបក្សកុម្មុយនិស្ដ។

សូមបញ្ជាក់ថា ការលាលែងពីតំណែងរបស់លោក Vo Van Thuong មានអាយុ៥៣ឆ្នាំ ធ្វើឡើងតែប៉ុន្មានថ្ងៃប៉ុណ្ណោះ ក្រោយប៉ូលិសវៀតណាម បានប្រកាសពីការឃាត់ខ្លួនអតីតមន្ត្រីវៀតណាមម្នាក់ប្រចាំខេត្ត Quang Ngai ដែលមានជាប់ពាក់ព័ន្ធនឹងអំពើពុករលួយកាលពីជាង១០ឆ្នាំមុន អំឡុងលោក Thuong នៅកាន់តំណែងជាប្រធានបក្សប្រចាំខេត្តមួយនេះ នេះបើតាមការផ្សាយរបស់ Reuters ។