រាជរដ្ឋាភិបាលកម្ពុជា ត្រៀមថវិកាប្រមាណ២៥០លានដុល្លារ សម្រាប់ជួយដល់សហគ្រាសធុនតូច និងមធ្យម នៅឆ្នាំ២០២២

សេចក្ដីលម្អិត

ជំពូក៖ ព័ត៌មានជាតិ

(ភ្នំពេញ)៖ លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការ គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានអះអាងថា នៅឆ្នាំ២០២២ រាជរដ្ឋាភិបាលកម្ពុជា បានត្រៀមថវិកាចំនួន២៥០លានដុល្លារអាមេរិក សម្រាប់ជួយដល់វិស័យឯកជន ពិសេសសហគ្រាសធុនតូច និងមធ្យម។

បន្ថែមលើការត្រៀមថវិកា២៥០លានដុល្លារនេះ រាជរដ្ឋាភិបាលក៏ជំរុញឲ្យគ្រឹះស្ថានធនាគារ និងមីក្រូហិរញ្ញវត្ថុ ជួយបញ្ចេញឥណទានបន្ថែមសម្រាប់ជំរុញអាជីវកម្ម និងធរុកិច្ចផងដែរ។

ក្នុងសន្និសីទព័ត៌មានស្តីពី«យុទ្ធសាស្ត្រស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី» នាព្រឹកថ្ងៃទី១៤ ខែធ្នូ ឆ្នាំ២០២១ លោក ផាន់ ផល្លា បានបញ្ជាក់ថា

«យន្តការហិរញ្ញប្បទានសម្រាប់វិស័យឯកជន រាជរដ្ឋាភិបាលនឹងត្រៀមថវិកាប្រមាណ២៥០លានដុល្លារ សម្រាប់ឆ្នាំ២០២២ ជួយដល់សហគ្រាសធុនតូច និងមធ្យម ជាមួយនឹងការជំរុញឲ្យធនាគារពាណិជ្ជ និងគ្រឹះស្ថានមីក្រូហិរញ្ញត្ថុ បន្តផ្តល់ឥណទានដល់អាជីវកម្ម និងធុរកិច្ចនៅកម្ពុជា តាមរយៈការកែសម្រួលលក្ខខណ្ឌនានារបស់សាជីវកម្មធានាឥណទានកម្ពុជា ក៏ដូចជាការដាក់ចេញនូវកម្មវិធីសហហិរញ្ញប្បទាន ដែលកន្លងមកយើងធ្លាប់អនុវត្តន៍មួយចំនួនរួចមកហើយ»។

លោកបន្ថែមថា សម្រាប់យន្តការផ្សេងទៀត ដែលរាជរដ្ឋាភិបាលជំរុញ គឺយន្តការភាពជាដៃគូរវាងរដ្ឋ និងឯកជន ដែលជាក្របខណ្ឌសំខាន់មួយ មានគោលបំណងចម្បងកៀរគរប្រភពធនធានបន្ថែម ព្រមទាំងចំណេះដឹង,

ចំណេះធ្វើ, និងនវានុវត្តន៍ពីវិស័យឯកជន ឱ្យចូលរួមនៅក្នុងការផ្គត់ផ្គង់ហេដ្ឋារចនាសម្ព័ន្ធ និងសេវាសាធារណៈ

ក្នុងវិស័យអាទិភាពសំខាន់ៗ ដែលជាមូលដ្ឋានគ្រឹះ ក្នុងការជំរុញកំណើនសេដ្ឋកិច្ច និងការពង្រឹងភាពប្រកួតប្រជែងសេដ្ឋកិច្ចរបស់កម្ពុជា ក្រោមកម្មវិធីស្តារ និងជំរុញកំណើនសេដ្ឋកិច្ចនេះ៕

ដកស្រង់ពី៖ Fresh News