សហរដ្ឋ អាមេរិក ផ្តល់ជំនួយ អគារ​និង​ម៉ាស៊ីន ផលិត អុកស៊ីសែន​ដល់ កម្ពុជា​

សេចក្ដីលម្អិត

ជំពូក៖ ព័ត៌មានជាតិ

ភ្នំពេញ៖ប្រភពស្ថានទូតសហរដ្ឋអាមេរិកប្រចាំនៅកម្ពុជា បានឱ្យដឹងថារដ្ឋាភិបាលសហរដ្ឋអាមេរិក នា ថ្ងៃទី ១៤ ខែកញ្ញា ឆ្នាំ ២០២២ បានផ្តល់ជំនួយជាអគារ និងម៉ាស៊ីនផលិតអុកស៊ីសែនថ្មីមួយ មានទីតាំងនៅក្នុងខេត្តព្រះវិហារនៃប្រទេសកម្ពុជា ដែលនឹងផ្តល់អត្ថប្រយោជន៍ ដល់ ប្រជា ជន ជិត ៣០០ ០០០ នាក់។

រោងចក្រនេះ មានទីតាំងនៅ មន្ទីរពេទ្យបង្អែកខេត្ត ១៦ មករា និង ជាមូល និធ របស់ទីភ្នាក់ងារសហរដ្ឋ អាមេរិកដើម្បីការអភិវឌ្ឍន៍អន្តរជាតិ (USAID) ហើយត្រូវបាន សាងសង់ ក្នុងភាពជាដៃគូជាមួយអង្គការយូនីសេហ្វនិងក្រសួងសុខាភិបាល កម្ពុជា ។ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក W. Patrick Murphy មានប្រសាសន៍ថា ៖

«ម៉ាស៊ីននេះនឹងបំពេញតម្រូវការផលិតអុកស៊ីសែនសម្រាប់សេវាសំខាន់ៗ ដូចជា ការព្យាបាលអ្នកជំងឺ COVID-19 ការតាមដាន និងការព្យាបាលជំងឺសង្គ្រោះបន្ទាន់។

វាជាផ្នែកមួយក្នុងទឹកប្រាក់ជាង ១៦ លានដុល្លារ នៅក្នុងការគាំទ្ររបស់រដ្ឋាភិបាលសហរដ្ឋអាមេរិកចំពោះការឆ្លើយតបរបស់កម្ពុជាលើជំងឺ រាត ត្បាត និងជាឧទាហរណ៍ ដែលបង្ហាញនៃចំណងទាក់ទងដ៏រឹងមាំនៃប្រទេសទាំងពីររបស់យើង» ។

ពិធីសម្ពោធដាក់ឱ្យប្រើប្រាស់ជាផ្លូវការនូវ អគារនិងម៉ាស៊ីនផលិត អុកស៊ីសែន នេះ ជាទីតាំង ដំបូង គេនៅ ក្នុង ខេត្ត។ មន្ទីរពេទ្យបង្អែកខេត្ត ១៦ មករា បានបម្រើ ដល់ ស្រុកចំនួន ៧ ដែល មាន ប្រជាជន ប្រមាណ ២៨៤ ០០០ នាក់។

បន្ថែម ពី លើ ការ ផ្តល់ការ គាំទ្រយ៉ាងសំខាន់ សម្រាប់ការថែទាំអ្នកជំងឺ COVID-19 ការផ្គត់ផ្គង់អុកស៊ីសែន ដែលអាចជឿ ទុក ចិត្ត នឹង ផ្តល់ អត្ថ ប្រយោជន៍ យ៉ាង ច្រើន ដល់ សហគមន៍ ដែលពឹងផ្អែក លើសេវាព្យាបាលរបស់ មន្ទីរ ពេទ្យ ។

លោកស្រី Foroogh Foyouzat តំណាងអង្គការយូនីសេហ្វប្រចាំកម្ពុជា បាននិយាយថា ៖

«អុកស៊ីសែន អាចធ្វើឱ្យមានភាពខុសគ្នារវាងជីវិត និងសេចក្តីស្លាប់។ នេះជាមូលហេតុ ដែលអង្គការ យូនីសេហ្វ កំពុងធ្វើការជាមួយរាជរដ្ឋាភិបាលកម្ពុជា ដើម្បីកែលម្អការផ្គត់ផ្គង់អុកស៊ីសែន និងហេដ្ឋា រចនាសម្ព័ន្ធ ទន្ទឹមនឹងការកសាងសមត្ថភាពបុគ្គលិកសុខាភិបាលក្នុងការប្រើប្រាស់វា» ។

លោកស្រីបន្តថា ៖ «យើងសូមថ្លែងអំណរគុណយ៉ាងជ្រាលជ្រៅចំពោះសហរដ្ឋអាមេរិក និងជាពិសេសទីភ្នាក់ងារ USAID សម្រាប់ជំនួយម៉ាស៊ីនផលិតអុកស៊ីសែនថ្មី សម្រាប់សង្គ្រោះជីវិតនេះ ដែលនឹងជួយលើក កម្ពស់ សុខភាព ថ្ងៃនេះ និងបង្កើតភាពធន់ចំពោះបញ្ហាប្រឈមនៅថ្ងៃអនាគត» ។

ម៉ាស៊ីនផលិតអុកស៊ីសែន ជាម៉ាស៊ីនដែលអាចផលិតអុកស៊ីសែនចំនួន ៣០០ លីត្រ ក្នុង មួយ នាទី (LPM) ជាមួយនឹងស្ថានីយ៍ផ្ទុកដែលមានបំពង់ស៊ីឡាំង និង តភ្ជាប់ ទៅ បំពង់ អុកស៊ីសែនរបស់ មន្ទីរពេទ្យ។

ជាលទ្ធផលគម្រោងនេះនឹងជួយ មន្ទីរពេទ្យ ឈប់ទិញ បំពង់ អុកស៊ីសែន ពីអ្នកផ្គត់ផ្គង់ឯកជន បញ្ជូន បំពង់ អុកស៊ីសែន របស់ខ្លួនទៅកាន់ទីតាំងឆ្ងាយៗ សម្រាប់ បំពេញ ឡើងវិញទ្បើយ។

ដូច្នេះវានឹង ជួយ សន្សំ សំចៃ ពេលវេលា ថវិកា និងកាត់បន្ថយការប្រឈមនឹងកង្វះអុកស៊ីសែន ដែលបង្ក គ្រោះ ថ្នាក់ដល់ ការ ព្យាបាល អ្នកជំងឺ ៕

ដកស្រង់ពី៖ រស្មីកម្ពុជា