សម្តេចប្រធានព្រឹទ្ធសភា អញ្ជើញបញ្ចុះខណ្ឌសីមាឆ្លងព្រះវិហារថ្មី និងសម្ពោធសមិទ្ធផលនានា ក្នុងវត្តលុម្ពិនីសាលវ័ននារាម ហៅវត្តអូរសោម

សេចក្ដីលម្អិត

ជំពូក៖ ព័ត៌មានជាតិ

(ពោធិ៍សាត់)៖ នាព្រឹកថ្ងៃទី២៧ ខែមេសា ឆ្នាំ២០២៣នេះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបញ្ចុះខណ្ឌសីមាព្រះវិហារថ្មី និងសមិទ្ធផលនានាក្នុងវត្តលុម្ពិនីសាលវ័ននារាម ហៅវត្តអូរសោម ស្ថិតក្នុងឃុំអូសោម ស្រុកវាលវែង ខេត្តពោធិ៍សាត់។

វត្តអូរសោមជាវត្តមួយក្នុងចំណោមវត្តទាំង២៣ ក្នុងស្រុកវាលវែង មានផ្ទៃដីសរុប ៨៦,៦០៣ម៉ែត្រការ៉េ បច្ចុប្បន្នមានព្រះសង្ឃគង់នៅចំនួន៤អង្គ ភិក្ខុ២អង្គ សាមណេរ២អង្គ គណៈកម្មាការវត្តមានចំនួន ១២នាក់។ វត្តអូរសោមនេះត្រូវបានកសាងឡើងនៅថ្ងៃទី០១ ខែមករា ឆ្នាំ២០០៨។

សមិទ្ធផលនានាក្នុងវត្តនេះ ចាប់តាំងពីកសាងដំបូង មានដូចជា៖ បង្គន់អនាម័យ ៣ខ្នង ៥បន្ទប់ កុដ៥ខ្នង ស្មើ១១បន្ទប់ ក្លោងទ្វាចំនួន១ និងរបងចំនួន៨៣ផ្ទាំង ដោយក្នុង១ផ្ទាំងទំហំ២,៥ម៉ែត្រគុណ៣,៥ម៉ែត្រ។

នៅឆ្នាំ២០១៧ លោកកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា បានកសាងសាលាឆាន់១ខ្នងទំហំ២០ម៉ែត្រគុណ១២ម៉ែត្រ និងបានបញ្ចប់រួចរាល់នៅថ្ងៃទី០១ ខែមករា ឆ្នាំ២០១៨។

បច្ចុប្បន្ន លោកកិត្តិសង្គហបណ្ឌិត ទេព ងន អនុប្រធានទី២ នៃព្រឹទ្ធសភា ដោយមានការចូលរួមកសាងពី លោក ប្រាក់ ចំរើន និងភរិយា ព្រមទាំងបុត្រ រួមជាមួយលោក ទេព ធន រដ្ឋលេខាធិការក្រសួងរៀបចំដែនដីនគរូបនីយកម្ម និងភរិយា

ព្រមទាំងបុត្រ និងលោក សន លីវណ្ណ ទីប្រឹក្សាលោកកិត្តិសង្គហបណ្ឌិត ទេព ងន បានកសាងព្រះវិហារទំហំម៉ែត្រ៩,២០ម៉ែត្រ គុណ១៤,៦០ម៉ែត្រ ដែលត្រូវចាប់ផ្តើមកសាង នៅថ្ងៃទី៣០ ខែឧសភា ឆ្នាំ២០២២ និងបានបញ្ចប់ការកសាងនៅថ្ងៃព្រហស្បតិ៍ ទី២៣ ខែមីនា ឆ្នាំ២០២៣ ដោយចំណាយថវិកាសរុបអស់ចំនួន១៦៧.៦០០ដុល្លារអាមេរិក៕

ដកស្រង់ពី៖ Fresh News