គយចាប់ទូកដឹកឈើប្រណិតខុសច្បាប់ ៣ទូកុងតឺន័រ នៅជិតផែព្រែកត្នោត ខេត្តកំពត ដែលមប្រុងឆ្លងដែនទៅវៀតណាម

សេចក្ដីលម្អិត

ជំពូក៖ ព័ត៌មានជាតិ

(កំពត)៖ ទូកយន្តដឹកឈើប្រណិតខុសច្បាប់៣ទូកុងតឺន័រ ដែលមានផ្ទុកឈើ៥៣ដុំធំៗ បម្រុងឆ្លងដែនទៅប្រទេស វៀតណាម ត្រូវបានកម្លាំងការិយាល័យនាវាចរគយ សហកាជាមួយសកម្លាំងអាវុធ ហត្ថលើផ្ទៃប្រទេសបង្ក្រាបបាន នៅចម្ងាយ៣គីឡូម៉ែត្រ ពីផែព្រែកត្នោត ខេត្តកំពត។

មន្ត្រីគយដែលបង្ក្រាបករណី រត់ពន្ធឈើខុសច្បាប់នេះ បានបញ្ជាក់ប្រាប់បណ្តាញព័ត៌មាន Fresh News នៅថ្ងៃទី១៨ ខែកក្កដានេះថា ការបង្ក្រាបនេះធ្វើឡើងនៅម៉ោង១០យប់ ថ្ងៃទី១៧ ខែកក្កដា ឆ្នាំ២០១៨។

មន្ត្រីដដែលបន្តថា ការបង្ក្រាបនេះដោយមាន ការបញ្ជាផ្ទាល់ពីលោក កើត សុទ្ធារ៉ា ប្រធាននាយកដ្ឋានបង្ការ និងបង្ក្រាបបទល្មើស នៃអគ្គនាយកដ្ឋានគយ ទើបលោក ឯម ណារិទ្ធ ប្រធានការិយាល័យនាវាចរគយ ដឹកនាំកម្លាំងសហការជា មួយកងរាងអាវុធហត្ថផ្ទៃប្រទេស ចុះត្រង់ចំណុចភូមិសាស្រ្តខាងលើ ក៏ប្រទះឃើញទូកយន្តឈើមួយគ្រឿង កំពុងលិចនៅក្នុងផ្ទៃទឹក ដែលមានជម្រៅប្រហែលបីម៉ែត្រ ទើបកម្លាំងសមត្ថកិច្ច ចុះឆែកឆេរ ប៉ុន្ដែពុំឃើញមាននរណាម្នាក់ នៅលើទូកនោះឡើយ ឃើញតែទូកុងតឺទ័រចំនួនបីគត់ បន្សល់ទុកក្នុងទូកនោះ។

បច្ចុប្បន្នទូកុងតឺន័រផ្ទុកឈើទាំងនោះ ត្រូវបានកម្លាំងសមត្ថកិច្ច ស្ទួចយកមករក្សាទុកនៅ កន្លែងឈរជើង បណ្ដោះអាសន្នរបស់ ការិយាល័យនាវាចរគយ និងធ្វើកំណត់ហេតុបញ្ចូនមកអគ្គនាយកដ្ឋានគយ និងរដ្ឋាករកម្ពុជា ដើម្បីរង់ចាំការសម្រេច ពីលោកអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា៕

ដកស្រង់ពី៖ Fresh News