ល្បីថា Wanna One គ្រោង​វិលវិញជាក្រុម មកទាំងអាល់ប៊ុម និងការសម្ដែងពិសេសឆាប់ៗ

សេចក្ដីលម្អិត

ជំពូក៖ ព័ត៌មានផ្សេងៗ

មានព័ត៌មានមកថា Wanna One កំពុងពិភាក្សាគ្នាក្នុងការវិលជុំគ្នាវិញទាំងអាល់ប៊ុម និងការបង្ហាញការសម្ដែងលើការប្រគំតន្ត្រី។

បើយោងតាមសេចក្ដីរាយការណ៍ពី JTBC បានឲ្យដឹងថា Wanna One ពេលនេះកំពុងពិភាក្សាគ្នា ទៅលើការដែលអាចរកឱកាសណាមួយក្នុងការវិលជុំសមាជិកទាំងអស់ចេញអាល់ប៊ុមមួយ។

ប្រភពជិតស្និទ្ធបានបង្ហើបថា៖ «នេះគឺជាកិច្ចពិភាក្សាដែលត្រូវបានលើកមកជារៀងរាល់ឆ្នាំ មុនរដូវកាលនៃកម្មវិធីប្រគល់ពានរង្វាន់មកដល់ ប៉ុន្តែលើកនេះ ទំនងជាមានការជួបជុំគ្នាកើតឡើង»។ ការពិភាក្សាគ្នាពេលនេះ ក៏មានការសហការជាមួយនឹង CJ ENM ដែរ ដោយគិតគូរទៅលើមិនត្រឹមតែរៀបចំការសម្ដែងជុំគ្នាលើឆាកទេ ប៉ុន្តែក៏អាចនឹងមានចេញជាអាល់ប៊ុមរួមសម្រាប់ក្រុម Wanna One ដែរ។

កត្តាសំខាន់មួយទៀតក្នុងការដែលអាចវិលជុំគ្នាវិញ គឺផ្អែកលើឆន្ទៈរបស់សមាជិករួមក្រុមទាំងអស់ផង។ I.O.I អាចធ្វើបាន ដោយជុំគ្នាបង្ហាញការសម្ដែងកាលពីខែឧសភា ឆ្នាំ២០២១ ដូច្នេះពេលនេះក៏គួរដល់វេនរបស់ Wanna One ដែរ៕

ដកស្រង់ពី៖Sabay