ជប៉ុន ផលិត​​​ឧបករណ៍​​ចម្លែក​មួយ​​ភ្ជាប់​​នឹង​ចង្កឹះ​វេទមន្ត ធ្វើ​ឲ្យ​រសជាតិ​​ទឹកស៊ុប​​​ឆ្ងាញ់​ល្មម​​ហុត​ទៅ​​ចាប់​មាត់​ជីបៗ​

សេចក្ដីលម្អិត

ជំពូក៖ ព័ត៌មានផ្សេងៗ

តាមការសិក្សាស្រាវជ្រាវបានរកឃើញថា ប្រជាជនជប៉ុនវ័យកណ្ដាលច្រើនជាង ៥០% មានរសនិយមចូលចិត្តហុតទឹកស៊ុបក្តៅៗនិងមានរសជាតិប្រៃៗ ថ្មីៗនេះប្រព័ន្ធផ្សព្វផ្សាយបានចុះផ្សាយពីកំពូលមនុស្សឆ្លាតវៃម្នាក់ជនជាតិជប៉ុនបង្កើតបាន ចង្កឹះទេវមន្តដំបូងគេបំផុតលើពិភពលោក មានសមត្ថភាពអាចធ្វើឲ្យរសជាតិទឹកស៊ុបឆ្ងាញ់ល្មមហុតចាប់មាត់ជីបៗ។

ចំពោះដំណើការនៃចង្កឹះសុខភាពដ៏ទំនើបនេះមានរូបរាងដូចទៅនឹងចង្កឹះធម្មតាដែរ ប៉ុន្តែឆ្លាតជាងព្រោះវាមានភ្ជាប់ដោយដែកចម្លងចរន្តមួយគូហើយគេភ្ជាប់វាតាមរយៈខ្សែភ្លើងមួយដោយ ប្រើប្រាស់បច្ចេកវិទ្យារលកសញ្ញាអេឡិចត្រូនិច Electrical Stimulation Waveform ជាមួយនឹងឧបករណ៍មួយហៅថា Mini Computer មានបន្ទះឈីបពិសេសនៅក្នុងនោះដែលគេរចនាវាឡើងដោយមានខ្សែសម្រាប់ពាក់នៅលើ កដៃ ដូចខ្សែនាឡិកា នៅពេលអ្នកហុតទឹកស៊ុប វានឹងបំប្លែងអ៊ីយ៉ុងសូដ្យូមក្នុងទឹកស៊ុប តាមរយៈឧបករណ៍ទៅចង្កឹះដោយដំណើការបន្ថែមរសជាតិបញ្ចូនទៅកាន់អណ្ដាតធ្វើឲ្យជិវ្ហាញ្ញាណយើងទទួលអារម្មណ៍ថា ម្ហូបមានជាតិជាងមុន។

លោក Homei Miyasshita ដែលជាសាស្រ្តាចារ្យផ្នែកបច្ចេកវិទ្យានិងវិទ្យាសាស្ត្រ នៃសាកលវិទ្យាល័យ Meiji នៅប្រទេសជប៉ុន និងជាអ្នកស្រាវជ្រាវធ្វើការជាមួយក្រុមហ៊ុនម្ហូបអាហារជប៉ុន Kirin Holdings ផ្ដួចផ្ដើមផលិតបាន ឧបករណ៍មួយភ្ជាប់នឹងចង្កឹះមួយគូមានសមត្ថភាពអាចប្រែក្លាយទៅជា ចង្កឹះទេវមន្ត និងជាចង្កឹះសុខភាពដ៏ល្អបំផុត។ សាស្រ្តាចារ្យបានបន្ថែមទៀតថា ផលិតផលនេះលោករំពឹងនឹងធ្វើឲ្យអ្នកប្រើប្រាស់ផ្លាស់ប្តូរទម្លាប់នៃការហូបអាហារ វាក៏នឹងក្លាយជាជំនួយការដ៏ល្អ សម្រាប់អ្នកស្រលាញ់សុខភាព។ បច្ចុប្បន្ន ចង្កឹះវេទមន្តនេះនៅមិនទាន់មានលក់លើទីផ្សារនៅឡើយទេ យ៉ាងយូរបំផុតអាចនឹងចេញជាផលិតផលសម្រេចនៅចុងឆ្នាំ ២០២២ ខាងមុខនេះ។

 ដកស្រង់ពី៖ Sabay