គន្ធ តារាវណ្ណ ទើបរួចផុតពីគ្រោះធំ តែពោលអស់សង្ឃឹមក្នុងការវិលចូលសិល្បៈវិញ

សេចក្ដីលម្អិត

ជំពូក៖ ព័ត៌មានផ្សេងៗ

តារាសម្ដែងប្រុសដែលប្រឡូកក្នុងវិស័យសិល្បៈតាំងពីទសវត្ស៨០ គន្ធ តារាវណ្ណ

បានចេញពីមន្ទីរពេទ្យកាលម៉ែត្រ ទៅសម្រាកនៅផ្ទះ និងបន្ដប្រើថ្នាំតាមវេជ្ជបញ្ជាហើយ គិតត្រឹមថ្ងៃទី១២ ខែកក្កដា ឆ្នាំ២០២២ បន្ទាប់ពីឆ្លងកាត់ដំណាក់កាលវះកាត់បញ្ហាស្ទះបំពង់ទងថង់ប្រម៉ាត់រួចរាល់។ លោក គន្ធ តារាវណ្ណ បានប្រាប់ Sabay នៅមុននេះបន្ដិចថា អស់រយៈពេល ១៥ថ្ងៃហើយ ដែលលោកបានវះកាត់ និងសម្រាកនៅមន្ទីរពេទ្យ ដើម្បីព្យាបាល។

ឥឡូវរូបលោកកំពុងឲ្យកូនប្រុសជូនទិញថ្នាំពេទ្យនៅខាងក្រៅបន្ថែមតាមវេជ្ជបញ្ជា ហើយស្ថានភាពសុខភាពមិនទាន់ត្រឡប់មកដូចដើមវិញទេ។ លោក គន្ធ តារាវណ្ណ៖ “ក្រោយវះកាត់…ប៉ានៅវិលៗ មិនទាន់មានកម្លាំងកំហែងអីទេកូនអើយ! ពេទ្យគេថា ស្ទះទងប្រម៉ាត់ ហើយយើងភ្នែកឡើងលឿង នោមមកក៏លឿង ស្បែកឡើងលឿង យើងក៏វះកាត់ ហើយជំងឺលើសឈាមនោះ គេឲ្យលេបថ្នាំបន្ដដែរ”។ លោក គន្ធ តារាវណ្ណ ដែលបច្ចុប្បន្នមានវ័យ ៧១ឆ្នាំ អះអាងថា សព្វថ្ងៃលោកពុំនៅជាប់កុងត្រាថតរឿងឬស្ពតឲ្យផលិតកម្មណាទៀតនោះទេ។ ពីថ្ងៃនេះទៅលោកថាពិបាកនឹងវិលចូលសិល្បៈវិញណាស់ ព្រោះតែស្ថានភាពសុខភាពកាន់តែយ៉ាប់។

លោក គន្ធ តារាវណ្ណ គឺជាតារាសម្ដែងមួយរូប មានភាពល្បីល្បាញតាំងឆ្នាំ១៩៨៦ រហូតដល់បច្ចុប្បន្ន ប៉ុន្ដែទើបថ្មីៗលោកមិនអាចទទួលថតទៀតបានក៏ដោយសារបញ្ហាជំងឺលើសឈាម និងជំងឺប្រម៉ាត់៕

ដកស្រង់ពី៖ Sabay