ប៉ះគ្នាពីរលើក ឥឡូវនេនទុំ ច្បិចយកក្បួន ព្រហ្ម ម៉ាញ ទៅបន្ថែមរសជាតិចម្រៀងពីរបទថ្មីទៀត

សេចក្ដីលម្អិត

ជំពូក៖ ព័ត៌មានផ្សេងៗ

តារាចម្រៀងរ៉េប សម្បូរវោហារលោក ទី ទុំ ហៅនេនទុំ ត្រៀម Original song ចំនួន ២បទ ដើម្បីអបអរសាទរក្នុងឱកាសបុណ្យចូលឆ្នាំសកល ២០២៣។

អ្វីដែលកាន់តែពិសេសក្នុងបទចម្រៀងទាំងនេះ គឺលោកបានច្បិចយកគំនិត និងបទពិសោធន៍លេងពាក្យជួនល្អៗរបស់សិល្បករជើងចាស់ផ្នែកចម្រៀងអាយ៉ៃ ព្រហ្ម ម៉ាញ ទៅបន្ថែមរសជាតិទៀតផង។ បន្ទាប់ពីប៉ះគ្នាពីរលើក ក្នុងបទ“ពូ ក្មួយ ចង់បានប្រពន្ធ” និងបទ“តុងទីន វ័ណ្ឌក” សម្រាប់បញ្ចូលក្នុងខ្សែភាពយន្ដរឿង "លោកគ្រូប្រពន្ធល្អ” នេនទុំ និងលោកព្រហ្ម ម៉ាញ ត្រូវបានមហាជនកោតសរសើរកាន់តែខ្លាំងនូវសំនួនវោហារមិនចេះរីងស្ងួតរបស់លោកទាំងពីរ។

ក្នុងឱកាសសម្ពោធចាក់បញ្ចាំងខ្សែភាពយន្ដមួយ នាផ្សារទំនើបអ៊ីអន១ កាលពីពេលថ្មីៗនេះ នេនទុំ បានប្រាប់Sabay ថា ចំពោះបទក្រោយៗលោកត្រូវបង្កើនការប្រុងប្រយ័ត្នលើពាក្យជួន ហើយក៏ត្រូវសរសេរឲ្យកាន់តែលម្អិតមុនយកទៅចម្រៀង ព្រោះឆ្លងតាមបទពិសោធន៍ជាមួយលោក ព្រហ្ម ម៉ាញ ដែលជាអ្នកពូកែខាងចាប់ពាក្យជួន គឺលំបាកមែនទែន តែចម្រៀងចេញទៅមានគុណភាព។

ដោយមើលឃើញសន្ទុះ នៃការគាំទ្រលើបទចម្រៀងដែលលោកច្រៀងរួមគ្នាជាមួយលោក ព្រហ្ម ម៉ាញ នេះហើយ ទើបជំរុញឲ្យលោកកាន់តែមានកម្លាំងចិត្ដផលិតបទចម្រៀងដោយបញ្ចូលឃ្លោងឃ្លាសុទ្ធតែជាពាក្យជួនល្អៗទៅក្នុងចម្រៀងទាំងពីរបទដែលនឹងត្រូវចេញអំឡុងពេលប្រជានខ្មែរសប្បាយរីករាយក្នុងឱកាសបុណ្យឆ្លងឆ្នាំសកល។ ចម្រៀងទាំងពីរបទ គឺទី១ បទ"ខ្ញុំចង់មានស្នេហា" និងបទទី២ "I can’t sleep without you”៕

ដកស្រង់ពី៖ Sabay