Capital A សម្ពោធកម្មវិធី 'Ask Bo' ដោយប្រើបច្ចេកវិទ្យាថ្មី ដើម្បីធ្វើទំនើបកម្មជូនអតិថិជនAir Asia

សេចក្ដីលម្អិត

ជំពូក៖ ព័ត៌មានផ្សេងៗ

ក្រុមហ៊ុន Capital A Berhad ដែលមានក្រុមហ៊ុនបុត្រសម្ព័ន្ធជាច្រើន និងជាមេក្រុមហ៊ុនអាកាសចរណ៍តម្លៃទាបឈានមុខគេនៅអាស៊ី AirAsia បានរំលឹកឡើងវិញនូវការប្តេជ្ញាចិត្តរបស់ខ្លួនក្នុងការទំនាក់ទំនងប្រកបដោយតម្លាភាព និងផ្ដល់សេវាកម្មកាន់តែប្រសើរឡើងសម្រាប់ភ្ញៀវទាំងអស់គ្នា។

វាជាចក្ខុវិស័យរបស់ក្រុមហ៊ុនដ៏ធំមួយមានមូលដ្ឋាននៅប្រទេសម៉ាឡេស៊ីនេះ ក្នុងការវិវត្ដខ្លួនទៅជាអ្នកឯកទេសទំនាក់ទំនងល្អបំផុត រក្សាបាននូវកេរ្ដិ៍ឈ្មោះក្រុមហ៊ុនដែលឈានមុខគេក្នុងការឆ្លើយតបលឿន និងឆ្លើយតបទីផ្សារក្នុងតំបន់។ ក្នុងនាមជាលំដាប់ទីមួយ នៃអាជីវកម្ម ក្រុមហ៊ុន Capital A បានធ្វើសន្និសីទសារព័ត៌មានមួយកាលពីថ្ងៃទី៨ ខែកុម្ភៈ ឆ្នាំ២០២៣ នៅប្រទេសម៉ាឡេស៊ី ដែលដឹកនាំដោយនាយកប្រតិបត្តិ Tony Fernandes និងនាយកប្រតិបត្តិក្រុមហ៊ុន AirAsia Aviation Group លោក Bo Lingam បានទម្លាក់ចោលនូវការងារហៅទូរស័ព្ទឆ្លើយសំណួរ ឬស្ដាប់ការត្អូញត្អែរបស់ភ្ញៀវដែលក្រុមហ៊ុន AirAsia Virtual Allstar AVA ធ្លាប់ធ្វើតាំងពីឆ្នាំ២០១៩ ហើយត្រូវជំនួសមកវិញដោយកម្មវិធីបញ្ញាសិប្បនិម្មិត ឬAI “Ask Bo” និងម៉ាស៊ីនរៀន “ML” ។

លោក Tony Fernandes បានថ្លែងក្នុងឱកាសនោះថា ភ្ញៀវមួយចំនួនបានត្អូញត្អែរពីប្រព័ន្ធ AI chatbot ដំបូងគេរបស់ក្រុមហ៊ុន ហើយស្ថាបនិករបស់ក្រុមហ៊ុនផ្ទាល់ក៏មិនសូវពេញចិត្ដប្រព័ន្ធនោះដែរ ទើបក្រុមហ៊ុនទទួលយកមតិរិះគន់ពីភ្ញៀវទាំងនោះមកកែលំអរ។ លោក Tony Fernandes ៖ “យើងទទួលស្គាល់ថានៅមានការខ្វះខាត មិនសមបំណងអតិថិជន ហើយយើងក៏ចង់ធ្វើឱ្យកាន់តែប្រសើរឡើង។

យើងសូមអរគុណ AVA សម្រាប់សមិទ្ធិផលរបស់ខ្លួនក្នុងការដោះស្រាយភ្ញៀវជាង ១១៣ លាននាក់ចាប់តាំងពីឆ្នាំ ២០១៩ និងបានដោះស្រាយសំណួរជាង ៤៣លានក្នុងឆ្នាំ ២០២០ ក្នុងពេលដែលស្ថានភាពជំងឺកូវីដ-១៩ កំពុងឆ្លងរាតត្បាតខ្លាំងនៅលើពិភពលោក”។ ក្រុមហ៊ុនអាកាសចរណ៍ AirAsia មានការបង្វិលសងប្រាក់រាប់ពាន់ និងការស្នើសុំផ្លាស់ប្តូរជើងហោះហើរ ដោយមនុស្សតែម្នាក់ឯងមិនអាចទ្រាំទ្របាន ទើបក្រុមហ៊ុនត្រូវប្រើបច្ចេកវិទ្យាថ្មី ហើយកាន់តែទំនើបនេះ។ បុគ្គលិកក្រុមហ៊ុន បានស្វែងយល់ AVA ពីរបៀបប្រើប្រាស់បញ្ញាសិប្បនិម្មិត ដើម្បីឆ្លើយសំណួរដែលស្មុគស្មាញ និងធំជាងមុន ហើយបានកាន់តែលឿនជាងមុន។ នាយកប្រតិបត្ដិ លោក Tony Fernandes បន្ថែមថា ក្នុងរយៈពេល ៨ខែចុងក្រោយនេះ ក្រុមទទួលមតិអតិថិជន បានយកចិត្តទុកដាក់លើអ្វីដែលភ្ញៀវត្រូវការ និងចង់បាន ហើយធ្វើការកំណត់សម្គាល់ថាអ្វីដែលភ្ញៀវត្រូវការខ្លាំងបំផុត ទើបថ្ងៃនេះ ក្រុមហ៊ុនបង្កើតកម្មវិធី Ask Bo ឡើងដោយដាក់ឈ្មោះតាម CEO ក្រុមហ៊ុនអាកាសចរណ៍ផ្ទាល់ គឺលោក Bo Lingam។

Bo បាននៅធ្វើការជាមួយលោក ២១ឆ្នាំហើយ ដូច្នេះលោកគឺជាមនុស្សម្នាក់បានដឹងទាំងអស់ពីសំណូមពររបស់អតិថិជន។ ក្នុងពេលជាមួយគ្នានេះ លោក Bo Lingam នាយកប្រតិបត្តិនៃក្រុមហ៊ុន AirAsia Aviation Group មានប្រសាសន៍ថា លោកពិតជាមានក្ដីសោមនស្សដែលក្រុមហ៊ុនបានដាក់ឈ្មោះ និងមុខមាត់របស់លោកទៅលើកម្មវិធីបែបDigital នេះ ដើម្បីបម្រើសេវាដល់អតិថិជន ហើយលោកក៏បានប្ដេជ្ញាចិត្ដថា កាន់តែសកម្ម និងយកចិត្ដទុកដាក់ខ្លាំងជាងមុន។ លោក Bo Lingam ៖ “តម្លៃទាបមិនមែនមានន័យថា គុណភាពសេវាកម្មទាបនោះទេ យើងបានយកចិត្ដទុកដាក់ខ្លាំងណាស់ ហើយយល់ពីអារម្មណ៍របស់ភ្ញៀវនៅពេលដែលសម្រេចចិត្ដជ្រើសរើសយកសេវាកម្មហោះហើរជាមួយយើង។ Ask Bo នឹងធ្វើឱ្យការធ្វើដំណើររបស់អតិថិជនកាន់តែងាយស្រួល និងផ្តល់ព័ត៌មានកាន់តែច្រើន"។

ចំណែក ប្រធានអាកាសយានដ្ឋាន និងជាមន្ត្រីបទពិសោធន៍អតិថិជន នៃក្រុមហ៊ុនអាកាសចរណ៍ AirAsia Aviation Group លោក Kesavan Sivanandam បាននិយាយថា មុខងារថ្មីជាច្រើនកំពុងត្រូវបានបន្ថែមទៅ Ask Bo វានឹងអាចផ្តល់ការផ្សាយផ្ទាល់លើស្ថានភាពជើងហោះហើរ ដូចជាការពន្យារពេល ការចេញដំណើរ ឬការផ្លាស់ប្តូរ និងការឡើងយន្តហោះ ជាមួយភាសាជាច្រើន។ ASK BO នឹងជូនដំណឹងអំពីការផ្លាស់ប្តូរនានានៅនាទីចុងក្រោយនៅថ្ងៃប្រតិបត្តិការ ហើយផ្តល់ព័ត៌មានអំពីអីវ៉ាន់ តាមដានទីតាំងមកដល់ របាយការណ៍អីវ៉ាន់ដែលមិនត្រឹមត្រូវ និងរាយការណ៍អំពីបច្ចុប្បន្នភាពដោយស្វ័យប្រវត្តិ នៃពេលវេលាចេញដំណើរតាមពេលវេលាជាក់ស្តែងទៅក្នុង Boarding Pass អេឡិចត្រូនិច ដើម្បីភាពកក់ក្ដៅរបស់ភ្ញៀវ។ លោក Kesavan Sivanandam បន្ថែមថា នៅខែមីនា ឆ្នាំ២០២៣ ខាងមុខ ភ្ញៀវអាចនិយាយផ្ទាល់ជាមួយភ្នាក់ងារមនុស្សរបស់យើងផងដែរ ក្នុងអំឡុងពេលអន្តរកម្ម Ask Bo ។

ក្រុមហ៊ុន នឹងបន្តបង្កើតអ្វីដែលថ្មីៗ ដើម្បីធានាបាននូវស្តង់ដារខ្ពស់បំផុតសម្រាប់អតិថិជន នៅគ្រប់អាជីវកម្មទាំងអស់ដែលក្រុមហ៊ុនមាន ដើម្បីបំពេញតម្រូវការភ្ញៀវ។ ក្នុងការដេញថ្លៃឱ្យកាន់តែបើកចំហ និងមានតម្លាភាព Capital A នឹងបង្ហាញព័ត៌មានលម្អិត និងទាន់ពេលសម្រាប់ការគ្រប់គ្រងអីវ៉ាន់នៅលើគេហទំព័រ និងSuper App។ ក្រុមហ៊ុន ក៏ប្តេជ្ញាថានឹងបន្តពិនិត្យឡើងវិញនូវមតិកែលម្អរបស់ភ្ញៀវទៅលើមុខងារនីមួយៗ គាំទ្រដល់ការសហការគ្នាតាមផ្នែក និងការទទួលយកកម្មវិធីបទពិសោធន៍អតិថិជនចូលទៅក្នុងអង្គភាពអាជីវកម្មផ្សេងៗ ដើម្បីធានាថាអ្នកដឹកនាំបានផ្តល់ជំនួយពេញលេញ ដើម្បីអនុវត្តប្រកបដោយជោគជ័យ ក្នុងគំនិតផ្តួចផ្តើមលើកកម្ពស់ CX ៕

ដកស្រង់ពី៖Sabay