ខេមរៈ សិរីមន្ដ បន្ទរពាក្យដ៏កម្រលើបទចម្រៀងទើបចេញថ្មីរបស់ខ្លួននៅចុងខែនេះ

សេចក្ដីលម្អិត

ជំពូក៖ ព័ត៌មានផ្សេងៗ

កំពូលតារាចម្រៀងប្រុសរបស់ផលិតកម្ម Galaxy Navatra ខេមរៈ សិរីមន្ដ បានបង្ហាញអារម្មណ៍មួយចំពោះបទចម្រៀងថ្មីរបស់ខ្លួន ទើបចេញលើបណ្ដាញសង្គម ហើយត្រូវបានគេចែកចាយ និងចូលស្ដាប់រាប់ម៉ឺនដងក្នុងរយៈពេលដ៏ខ្លី។

“Fake Love” គឺជាបទថ្មី ដែលតារាចម្រៀងមានងារជាឧកញ៉ា លេងស្ដាយប្លែកត្រូវចិត្ដយុវវ័យសម័យថ្មី។ បន្ទាប់ពីផលិតកម្ម បានបញ្ចេញបទចម្រៀងនេះមួយថ្ងៃ លោក ខេមរៈ សិរីមន្ដ បានបន្ទរបែបលេងសើចទៅកាន់អ្នកគាំទ្រថា៖ “បទថ្មី បើមិនពីរោះ មិនយកលុយ”។ ភ្លាមៗ មានមិត្ដសិល្បៈ និងអ្នកគាំទ្រ បានកោតសរសើរនូវបទថ្មីនេះ ហើយក៏សំណូមពរឲ្យមានបទថ្មីៗទៀតសម្រាប់អបអរសាទរក្នុងឱកាសបុណ្យចូលឆ្នាំថ្មីខាងមុខ។

ទន្ទឹមគ្នានេះគេក៏ឃើញតារាចម្រៀងល្បីៗជាច្រើនរូបទៀតរបស់ផលិតកម្ម Galaxy Navatra គឺមានដូចជា៖ លោក ព្រាប សុវត្ថិ ខេម និងលោក សេង វណ្ណៈ ជាដើម។ មុនសម្រុកផលិតបទចម្រៀងថ្មី ដើម្បីអបអរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៣ គេក៏ឃើញតារាល្បីៗក្នុងផលិតកម្មនេះឡើងឆាកជាហូរហែរដែរ។

ជាក់ស្ដែងនៅថ្ងៃទី៤ និងទី៥ ខែមីនា ខាងមុខនេះ តារាចម្រៀង ខេមរៈ សិរីមន្ដ ព្រាប សុវត្ថិ និងវង់ ថាណាន់ ជាដើមនឹងឡើងអង្រួនបេះដួងប្រិយមិត្ដនៅលើកដ៏អស្ចារ្យ នៅផ្សារជីបមុខ ផ្លូវ២៧១៕

ដកស្រង់ពី៖ Sabay