ឡាន​អគ្គិសនី​ថ្មី MG ផ្តោតលើ​កម្លាំង​ខ្លាំង តែតម្លៃ​វិញអាចធ្វើឱ្យ​គូប្រជែង​នៅមិន​ស្ងប់

សេចក្ដីលម្អិត

ជំពូក៖ ព័ត៌មានផ្សេងៗ

រថយន្តអគ្គិសនីថ្មី MG4 Xpower ត្រូវបានបង្ហាញចេញហើយក្នុងប្រទេសអង់គ្លេស ដែលវាចេញមកគឺផ្តោតខ្លាំងលើកម្លាំងខ្លាំងបំផុត និងតម្លៃប្រកួតប្រជែង ចាប់ពី ៤ម៉ឺន ៦ពាន់ដុល្លារឡើងទៅ។

រថយន្តនេះ ជា Spec ថ្មីមួយទៀតនៃរថយន្ត MG Mulan Triumph Edition នៅប្រទេសចិន ដែលបង្ហាញចេញកាលពីឆ្នាំមុន។ រថយន្ត MG4 XPower បំពាក់ម៉ូទ័រអគ្គិសនីចំនួន២ ដែលផលិតបានកម្លាំងសរុបបានរហូតទៅដល់ ៤២៩សេះ និងកម្លាំងរមួល ៦០០ញូតុនម៉ែត្រ រត់ប៉ុង២ រួមទាំងមានជំនួយពីប្រព័ន្ធគ្រប់គ្រងលំនឹងនៅលើផ្លូវកោង ឬផ្លូវបត់ ដែលជាប្រព័ន្ធសុវត្ថិភាពលើកដំបូងសម្រាប់ MG និងជាន់ស្ទុះពី ០ ដល់ ១០០គីឡូម៉ែត្រក្នុង១ម៉ោង ប្រើពេល ៣,៨វិនាទី។

ក្រុមហ៊ុន MG Motor ប្រចាំប្រទេសអង់គ្លេស រំពឹងថា អតិថិជននឹងពេញចិត្តខ្លាំងចំពោះរថយន្តអគ្គិសនីដ៏ខ្លាំងបំផុតរបស់ MG មួយនេះ។ ជាមួយគ្នានេះ MG4 Xpower ក៏នៅតែបំពាក់បច្ចេកវិទ្យា និងបរិក្ខាខ្ពស់ផងដែរ។ វានឹងក្លាយជារថយន្តប្រវត្តិសាស្រ្តមួយរបស់ MG សម្រាប់ឆ្នាំ២០២៣៕

ដកស្រង់ពី៖Sabay