ស្រះទឹកទំហំ១ហិកតា ជាអំណោយដ៍ថ្លៃថ្លារបស់សម្តេចតេជោ ហ៊ុន សែន ត្រូវបានប្រគល់ជូនប្រជាពលរដ្ឋប្រើប្រាស់ នៅស្រុកត្បូងឃ្មុំ

សេចក្ដីលម្អិត

ជំពូក៖ ព័ត៌មានខេត្ត

ទឹកមួយកន្លែង ដែលមានទំហំ១ហិកតា ស្ថិតនៅភូមិព្រៃកំពែង ឃុំអញ្ចើម ស្រុកត្បូងឃ្មុំ ដែលជាអំណោយរបស់សម្តេចតេជោ ហ៊ុន សែន តាមរយៈលោកឧបនាយករដ្ឋមន្ត្រី ជា សុផារ៉ា

ត្រូវបានប្រគល់ជូនប្រជាពលរដ្ឋប្រើប្រាស់ជាផ្លូវការហើយ នៅថ្ងៃទី២ ខែមិថុនា ឆ្នាំ២០២១ ក្រោមអធិបតីភាព ឯកឧត្តម ហាក់ សុខមករា និង ឯកឧត្តម កេង ប៊ុនណា អភិបាលរងខេត្តត្បូងឃ្មុំ។

មានប្រសាសន៍ទៅកាន់អាជ្ញាធរ ភូមិ ឃុំ និងតំណាងប្រជាពលរដ្ឋ ឯកឧត្តម ហាក់ សុខមករា បានលើកឡើងថា សម្តេចតេជោ ហ៊ុន សែន បានយកចិត្តទុកដាក់យ៉ាងខ្លាំងពីសុខទុករបស់ប្រជាពលរដ្ឋគ្រប់ទីកន្លែង ដោយមិនប្រកាន់និន្នាការនយោបាយ ឬជាតិសាសអ្វីឡើយ ជាក់ស្តែងដោយមើលឃើញពីតម្រូវការចាំចាច់របស់ប្រជាពលរដ្ឋ ក្នុងឃុំអញ្ចើម ស្រុកត្បូងឃ្មុំ ក្នុងការទាញយកទឹកសម្រាប់ធ្វើស្រែ និងប្រើប្រាស់តាមតម្រូវការផ្សេងៗ ទើបសម្តេចតេជោ តាមរយៈ ឯកឧត្តមឧបនាយករដ្ឋមន្ត្រី ជា សុផារ៉ា បានចាត់មន្ត្រីឱ្យចុះសិក្សា និងជីកស្រះសម្រាប់ស្តុកទឹកទំហំ ១ ហិកតាជាបន្ទាន់ ជាប្រយោជន៍សម្រួលដល់ប្រជាពលរដ្ឋក្នុងភូមិ ព្រៃកំពែង និងភូមិជាប់ៗនោះ ក្នុងការទាញយកទឹកបង្ករបង្កើនផល។

ទន្ទឹមការលើកឡើងដូចនេះ ឯកឧត្តម ក៏បានសំណូមពរដល់ប្រជាពលរដ្ឋ ត្រូវចូលរួមថែរក្សា ស្រះទឹកឱ្យបានល្អ ពោលគឺត្រូវចាត់ទុកថាជារបស់ខ្លួន ហើយទាញយកទឹកប្រើប្រាស់ឱ្យចំគោលដៅដើម្បីជាប្រយោជន៍រួមបានយូរអង្វែង។

ឆ្លៀតក្នុងឳកាសនោះ ឯកឧត្តម ហាក់ សុខមករា និងឯកឧត្តម កេង ប៊ុនណា អភិបាលរងខេត្តក៏បានដឹកនាំមន្ត្រីរាជការ និងប្រជាពលរដ្ឋដាំកូនត្នោត នៅជុំវិញបរិវេណស្រះទឹកនេះផងដែរ។

សួមបញ្ជាក់ថា ស្រះទឹកនោះមានទំហំ ១០០ម៉ែត្រ គុណនឹង ១០០ម៉ែត្រ ជម្រៅ ៣ម៉ែត្រ អាចទាញយកទឹកសម្រាប់ប្រើប្រាស់ និងស្រោចស្រពដីស្រែចម្ការប្រមាណ ៣១០ហិកតា របស់ប្រជាពលរដ្ឋជាង ៥០០គ្រួសារ រស់នៅ៣ភូមិ គឺភូមិព្រៃកំពែង ភូមិនាហ្មឺនខឹង និងភូមិព្រៃជង្រុក ក្នុងឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ៕