ឯកឧត្តម សរ សុវណ្ណ ផ្សព្វផ្សាយណែនាំពីការអនុវត្តនីតិវិធីចុះបញ្ជីដីធ្លី មានលក្ខណៈជាប្រព័ន្ធ នៅឃុំ/ស្រុកគោលដៅក្នុងខេត្តត្បូងឃ្មុំ ជូនដល់អាជ្ញាធរក្រុង/ស្រុក ក្រុមប្រឹក្សាឃុំ-សង្កាត់ និង មេភូមិ ប្រមាណជិត ២០០នាក់

សេចក្ដីលម្អិត

ជំពូក៖ ព័ត៌មានខេត្ត

(ត្បូងឃ្មុំ) ៖ ថ្ងៃទី០១ ខែធ្នូ ឆ្នាំ២០២៣ ឯកឧត្តម សរ សុវណ្ណ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ បានអញ្ជើញជាអធិបតី ក្នុងកិច្ចប្រជុំ ផ្សព្វផ្សាយណែនាំពីការអនុវត្តនីតិវិធីចុះបញ្ជីដីធ្លី មានលក្ខណៈជាប្រព័ន្ធ នៅឃុំ/ស្រុកគោលដៅក្នុងខេត្តត្បូងឃ្មុំ ជូនដល់អាជ្ញាធរក្រុង/ស្រុក ក្រុមប្រឹក្សាឃុំ-សង្កាត់ និង មេភូមិ ប្រមាណជិត ២០០នាក់។

កិច្ចប្រជុំនេះ ប្រព្រឹត្តទៅ នៅសាលប្រជុំ គ សាលាខេត្តត្បូងឃ្មុំ ដោយមានការចូលរួមពីសំណាក់ ប្រតិភូក្រសួង លោក ប៉ូច សុធារិទ្ធ ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី ខេត្តត្បូងឃ្មុំ លោកអនុប្រធានមន្ទីរ មន្ត្រីភូមិបាលក្រុង/ស្រុក អាជ្ញាធរក្រុង/ស្រុក ក្រុមប្រឹក្សាឃុំ-សង្កាត់ មេភូមិ និងអ្នកពាក់ព័ន្ធ ជាច្រើនរូប។

នាឱកាសនោះ ឯកឧត្តម សរ សុវណ្ណ រដ្ឋលេខាធិការក្រសួងរៀបចំដែនដី នគរូបនីយកម្ម និង សំណង់ បានលើកឡើងថា អរគុណសន្តិភាព ស្នាដៃដែលមិនអាចប្រកែកបាន ក្រោមការដឹកនាំផ្ទាល់របស់ សម្តេចតេជោ ហ៊ុន សែន អតីតនាយករដ្ឋមន្រ្តី បានដាក់ចេញគោលនយោបាយឈ្នះ-ឈ្នះ រហូតសម្រេចបាននូវការបញ្ចប់សង្គ្រាម និង ជម្លោះបែកបាក់ ធ្វើឱ្យប្រទេសជាតិមានសុខសន្តិភាពពេញផ្ទៃប្រទេស ដោយបានផ្តល់នូវឱកាសដ៏មហាសាលសម្រាប់កម្ពុជាក្នុងការអភិវឌ្ឍសង្គមកម្ពុជាឱ្យរីកចម្រើន និងធ្វើឱ្យជីវភាពប្រជាពលរដ្ឋកាន់តែល្អប្រសើរ។

ក្នុងនោះដែរឯកឧត្តម ក៏បានលើកនូវគោលនយោបាយយុទ្ធសាស្ត្រ បញ្ចកោណ របស់រាជរដ្ឋាភិបាល ក្រោមកិច្ចដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នីតិកាលទី៧ នៃរដ្ឋសភា នៅយុទ្ធសាស្ត្របញ្ចកោណ លើការងារដីធី្ល ដែលប្រមុខរាជរដ្ឋាភិបាលបានយកចិត្តទុកដាក់ខ្ពស់ ។

ឯកឧត្តម រដ្ឋលេខាធិការ បានណែនាំដល់អាជ្ញាធរ ក្រុង-ស្រុក ឃុំ-សង្កាត់ ទាំងអស់ក្នុងខេត្តត្បូងឃ្មុំទាំងអស់ ត្រូវគោរពឲ្យបានទៅតាមការណែនាំ របស់ក្រុមអ្នកបច្ចេកទេស ក្នុងការចុះបញ្ជីដីធ្លីនេះ និងសូមបន្តធ្វើការផ្សព្វផ្សាយ ណែនាំដល់ប្រជាពលរដ្ឋរបស់ខ្លួន ឲ្យមានឯកសារគ្រប់គ្រាន់ ព្រមទាំងត្រូវកំណត់ទំហំក្បាលដី និងចំនួនក្បាលដីរបស់ខ្លួនឲ្យបានច្បាស់លាស់ ជាពិសេសត្រូវកំណត់ព្រំដី ជាមួយដីជិតខាងឲ្យបានច្បាស់លាស់ ដើម្បីសម្រួលដល់ក្រុមការងារ ងាយស្រួលក្នុងការវាស់វែង ព្រមទាំងបញ្ជាក់ពីប្រវត្តិដីឲ្យបានជាក់លាក់ និងត្រូវបញ្ជាក់អ្នកគ្រប់គ្រង សំដៅងាយស្រួលក្នុងការចុះបញ្ជីដីធ្លី ជាទ្រព្យសម្បត្តិខាងប្រពន្ធ ឬ ប្តី ឬក៏ជាទ្រព្យសម្បត្តិរួម ឲ្យមានប្រសិទ្ធិភាពខ្ពស់។

ឯកឧត្តម សរ សុវណ្ណ ក៏បានផ្តល់នូវអនុសាសន៍ល្អៗមួយចំនួន ទុកជាមូលដ្ឋានគ្រឹះ សម្រាប់អាជ្ញាធរមូលដ្ឋាន ធ្វើការអនុវត្ត ដោយសហការជាមួយក្រុមការងារចុះបញ្ជីដីធ្លី ឲ្យដំណើការទៅដោយរលូនទៀតផង។ ទន្ទឹមនឹងនោះដែរឯកឧត្តមក៏បានជម្រុញដល់ក្រុមការងារ ចុះបញ្ជីដីធ្លី ជូនប្រជាពលរដ្ឋ ត្រូវខិតខំបំពេញភារកិច្ចឲ្យបានល្អត្រឹមត្រូវ និងឆាប់រហ័សស្របទៅតាមគោលការណ៍របស់រាជរដ្ឋាភិបាល ឲ្យបានរួចរាល់ទូទាំងប្រទេសនាឆ្នាំ២០២៥៕