ឯកឧត្តម លី ឡេង ជួបសំណេះសំណាល ជាមួយថ្នាក់ដឹកនាំមន្ទីរជុំវិញខេត្តត្បូងឃ្មុំ

សេចក្ដីលម្អិត

ជំពូក៖ ព័ត៌មានខេត្ត

ថ្ងៃទី៣០ខែឧសភា ឆ្នាំ ២០១៤ នៅស្រុកពញាក្រែក បានប្រារព្ធពិធីសំណេះសំណាល ជាមួយប្រធាន អនុប្រធានមន្ទីរ ជុំវិញខេត្តត្បូងឃ្មុំ ក្រោមអធិបតីភាពឯកឧត្តមលី ឡេង អភិបាលរងខេត្តត្បូងឃ្មុំ ដោយមានការចូលរួមពីសំណាក់ ឯកឧត្តម លោកជំទាវ អភិបាលរងខេត្ត ប្រធាន អនុប្រធានមន្ទីរ ប្រធានការិយាល័យ កងកំលាំងទាំងបី និងមន្រ្តីជាច្រើនរូបទៀត។

ឯកឧត្តមលី ឡេង មានប្រសាសន៍ថា ចាប់តាំងពីបង្កើតខេត្តត្បូងឃ្មុំមក យើងទាំងអស់គ្នាបានជួបសំណេះសំណាល និងពិភាក្សាការងារ ជាមួយឯកឧត្តម លោកជំទាវ អភិបាលរងខេត្ត ប្រធាន អនុប្រធានមន្ទីរ និងប្រធានការិយាល័យ ដែលត្រូវត្រៀមប្រកាសចូលកាន់ មុខតំណែងនាពេលខាងមុខនេះ ហើយពេលនេះមានឱកាសសំណេះសំណាល និងពិភាក្សាការងារជាមួយគ្នា លើគម្រោងរៀបចំ ពិធីប្រកាសស្ដីពីការបង្កើត និងដាក់ឲ្យដំណើរការរដ្ឋបាលខេត្តត្បូងឃ្មុំ នៅថ្ងៃទី០២ ខែឧសភា ឆ្នាំ២០១៤ខាងមុខ។

ឯកឧត្តម លី ឡេង មានប្រសាសន៍បន្តទៀតថា ខេត្តត្បូងឃ្មុំជាខេត្តថ្មី មិនទាន់ដំណើរការ និងអនុវត្តផែនការ ហេដ្ឋារចនាសម្ព័ន្ធ ព្រមទាំងទីកន្លែងធ្វើការងារនៅឡើយ ពោលគឺរាជរដ្ឋាភិបាល គ្រោងនិងប្រកាស់ដាក់អោយដំណើរការ រដ្ឋបាលខេត្តត្បូងឃ្មុំ និងរចនាសម្ព័ន្ធរបស់ មន្ទីរ អង្គភាព ទីកន្លែងធ្វើការងារ នៅថ្ងៃទី០២ ខែឧសភា ឆ្នាំ២០១៤នេះ ផងដែរ។

ឯកឧត្តម លី ឡេង បានសំណូមពរចំពោះឯកឧត្តម លោកជំទាវ អភិបាលរងខេត្ត ប្រធាន អនុប្រធានមន្ទីរ និងប្រធានការិយាល័យ ដែលត្រូវប្រកាសចូលកាន់ មុខតំណែងក្នុងខេត្តត្បូងឃ្មុំ នាពេលខាងមុខនេះ ត្រូវត្រៀមលក្ខណៈឲ្យបានល្អប្រសើរ ដើម្បីបំពេញភារកិច្ចជូន អង្គភាពក៏ដូចជាជូនខេត្ត និងប្រទេសជាតិឲ្យទទួលបានលទ្ធផល ខ្ពស់។