នគរបាលស្រុកបាទី ខេត្តតាកែវ ឃាត់ខ្លួនជនសង្ស័យ៣នាក់ ក្នុងករណីកាប់ប្លន់ម៉ូតូពលរដ្ឋម៉ោង១យប់រំលងអាធ្រាតលើផ្លូវជាតិលេខ២

សេចក្ដីលម្អិត

ជំពូក៖ ព័ត៌មានសន្តិសុខសង្គម

សមត្ថកិច្ចស្រុកបាទីឆ្មក់ចាប់ខ្លួនបានជនសង្ស័យចំនួន៣នាក់ ពាក់ព័ន្ធនឹងករណីកាប់ប្លន់ម៉ូតូប្រជាពលរដ្ឋ ដោយប្រើដាវ និងដំបងរលាស់ (ដែក) ដែលហេតុការនេះកើតឡើងនៅម៉ោង១រំលងអាធ្រាត នាថ្ងៃទី០១ ខែវិច្ឆិកា ឆ្នាំ២០២១ នៅតាមបណ្តោយផ្លូវជាតិលេខ២។

បើតាមលោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី បានប្រាប់ Fresh News ឱ្យដឹងថា កាលពីវេលាម៉ោង១៖០០នាទី ឈានចូលថ្ងៃទី០១ ខែវិច្ឆិកា ឆ្នាំ២០២១ មានករណីជិះម៉ូតូដេញកាប់ប្លន់យកម៉ូតូ និងធ្វើសកម្មភាពប្រដាប់ដោយដាវ និងដំបងរលាស់ (ដែក) ជិះម៉ូតូ០២គ្រឿង ដេញកាប់ប្លន់ម៉ូតូ ០១គ្រឿងម៉ាកហុងដា C125 សេរី២០១៤ ឡើងតែម២០២១ របស់ជនរងគ្រោះឈ្មោះ ង៉ែត សារ៉ាន់ ភេទប្រុស អាយុ៣៨ឆ្នាំ មានទីលំនៅភូមិរមេញ ឃុំរមេញ ស្រុកកោះអណ្តែត។

បន្ទាប់ពីទទួលបានព័ត៌មានខាងលើកម្លាំងជំនាញអធិការដ្ឋាននគរបាលស្រុកបាទី បានចុះដល់កន្លែងកើតហេតុធ្វើការស្រាវជ្រាវ ក្រោមការដឹកនាំបញ្ជាយ៉ាងយកចិត្តទុកដាក់របស់លោកឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ និងមានការសម្របសម្រួលនីតិវិធីពីសំណាក់ព្រះរាជអាជ្ញាអមសាលាដំបូងខេត្តតាកែវ ដើម្បីវែកមុខរកជនបង្កឱ្យឃើញយកមកផ្តន្ទាទោសឱ្យខានតែបាន ដោយប្រើប្រាស់គ្រប់វិធានការ និងសម្ភារៈពួនស្ទាក់គ្រប់ច្រកល្ហក រហូតដល់វេលាម៉ោង០៨ និង៣០នាទីព្រឹក ថ្ងៃខែឆ្នាំដដែល កម្លាំងជំនាញកំណត់មុខសញ្ញារហូតឈានដល់ឃាត់ខ្លួនមុខសញ្ញាសង្ស័យបានចំនួន០៣នាក់។ ជនសង្ស័យត្រូវបានឃាត់ខ្លួន នៅចំណុចផ្ទះសំណាក់យីហោ (មាន មាន) ស្ថិតក្នុងភូមិរុន ឃុំចំបក់ ស្រុកបាទី រួមមាន៖ ទី១៖ ឈ្មោះ សិលា រ៉ាវុធ ហៅវិត ភេទប្រុស អាយុ២៥ឆ្នាំ រស់នៅភូមិតានប់ ឃុំចំបក់ ស្រុកបាទី, ទី២៖ ឈ្មោះ ផន បញ្ញា ភេទប្រុស អាយុ២១ឆ្នាំ រស់នៅភូមិត្រពាំងលាន ឃុំចំបក់ ស្រុកបាទី និងទី៣៖ ឈ្មោះ ឆាន ប៊ុនណា ភេទប្រុស អាយុ១៩ឆ្នាំ រស់នៅភូមិរវៀង ឃុំរវៀង ស្រុកសំរោង។

ចំណែកជនសង្ស័យ០១នាក់ទៀតមានឈ្មោះ សេង សុវណ្ណ ភេទប្រុស អាយុ២៧ឆ្នាំ រស់នៅភូមិស្រមោចហែ ឃុំចំបក់ ស្រុកបាទី (បានជិះម៉ូតូជនរងគ្រោះរត់គេចខ្លួនបាត់)។ ក្រោយឃាត់ខ្លួន ជនសង្ស័យទាំង០៣នាក់ បានសារភាពថា ពួកគេពិតជាបានធ្វើសកម្មភាពដេញកាប់ប្លន់យកម៉ូតូពីជនរងគ្រោះ នៅចំណុចខាងលើប្រាកដមែន ព្រមទាំងដកហូតបានវត្ថុតាងរួមមានម៉ូតូ ជិះធ្វើសកម្មភាពចំនួន ០២គ្រឿង ដាវចំនួន ០២ដើម និងដំបងរលាស់(ដែក) ០១ដើម។ បច្ចុប្បន្នជនសង្ស័យត្រូវបានសមត្ថកិច្ចកំពុងកសាងសំណុំរឿងបញ្ជូន ទៅសាលាដំបូងខេត្តតាកែវ ចាត់ការតាមនីតិវិធី និងបន្តស្រាវជ្រាវរកជនសង្ស័យម្នាក់ទៀត កំពុងរត់គេចខ្លួនដើម្បីយកមកផ្តន្ទាទោសតាមច្បាប់៕

ដកស្រង់ពី៖ FreshNews