ស៊ីហ្គេម ​២០២៣ ​សម្ដេច​បញ្ជាក់​ថា​នឹង​ធ្វើ​មុន​ការ​បោះ​ឆ្នោត​ថ្នាក់​ជាតិ​

សេចក្ដីលម្អិត

ជំពូក៖ ព័ត៌មានកីឡា

ក្នុងឱកាសបើកការដ្ឋានសាងសង់ផ្លូវល្បឿនលឿន ភ្នំពេញ-ខេត្តព្រះសីហនុ នៅព្រឹកមិញនេះ សម្ដេចតេជោ ហ៊ុន សែន បញ្ជាក់ថាការប្រកួតស៊ីហ្គេមឆ្នាំ២០២៣នឹងធ្វើឡើងនៅខែឧសភា ពោលគឺមុនពេលបោះឆ្នោតថ្នាក់ជាតិ។

ការរៀបចំស៊ីហ្គេម មុនបោះឆ្នោតនេះ គឺដើម្បីបញ្ចៀសបញ្ហាផ្សេងៗ ដែលអាចកើតមានឡើងក្រោយការបោះឆ្នោត។ មួយវិញទៀតនៅពេលនោះ វាចំពេលដែលផ្លូវល្បឿនលឿនសាងសង់រួចល្មម ហើយវានឹងជួយសម្រួលដល់ការធ្វើដំណើររបស់កីឡាករផងដែរ ព្រោះកីឡាមួយចំនួននៅស៊ីហ្គេម នឹងលេងនៅឯខេត្តព្រះសីហនុផងដែរ។

ផ្លូវល្បឿនលឿនខាងលើនេះ វិនិយោគដោយក្រុមហ៊ុនសាជីវកម្មស្ពាននិងថ្នល់ចិន (CRBC) តាមរយៈក្រុមហ៊ុនខេមបូឌាន ភីភីអេសអេចវី អិចប្រេសវ៉េ (Cambodian PPSHV Expressway Co., Ltd ) ត្រួតពិនិត្យ និងផ្តល់ការប្រឹក្សាបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេស Minconsult SDN BHD ដោយប្រើប្រាស់ថវិកាវិនិយោគប្រមាណជិត ២ពាន់លានដុល្លារអាមេរិក និងប្រើប្រាស់ថវិកាបដិភាគ ដែលជាហិរញ្ញប្បទានឥតសំណងពិសេសរបស់រដ្ឋាភិបាលនៃសាធារណរដ្ឋប្រជាមានិតចិន ប្រមាណ ១៥០លានដុល្លារអាមេរិក ដែលត្រូវប្រើរយៈពេលសាងសង់ចំនួន ៤៨ខែ ដោយគិតចាប់ផ្តើមពីខែមីនា ឆ្នាំ២០១៩ និងបញ្ចប់នៅខែមីនា ឆ្នាំ២០២៣៕

ដកស្រង់ពី៖ Sabay